香港新浪網 MySinaBlog
« 上一篇 | 下一篇 »
不敗的魔術師 | 07-Jul-11, 17:18 | 投資理財, 親朋戚友, 地方智慧 | (1637 Reads)

這天朋友S又來找魔術師傾訴。魔術師劈頭第一句就問佢:「上次你個港女老婆扭計要你送iPhone,買咗未呀?」

S答曰:「無呀!結果買咗部冷氣,大家有得涼!」

嘩!iPhone變冷氣,呢個答案真係爆到無命!

話說魔術師好歹都是S在投資道上的哎吔「啟蒙師傅」,今次S來訪,就係因為乜叉都唔識嘅港妻被投資顧問游說做「教育基金」,S覺得此乃WB(搵笨)之舉,便想「慳慳地」買份保險算數,早前魔術師教過佢唔好買啲咩嘢投資相連保險和101之類,於是佢就想問呢個term life insurance plan買唔買得過:

保額:港幣5,000,000

性別:男

年齡:XX

吸煙:非吸煙者

受保年期:30年

保金:每月港幣1,964/每年港幣22,450

魔:點解你諗住買呢份保險?

S:我怕如果我日後有乜冬瓜豆腐,個仔無依無靠吖馬!

魔:即係話受益人係寫你個仔架喇!

S:係。

魔:第一,你個港女老婆同你係同事,都叫係經理級,收入分别唔大。你怕「有乜冬瓜豆腐,個仔無依無靠」,咁即係你老婆同樣都要買一份嘍?如果港女老婆唔買,即係你死咗就怕個仔無依無靠,佢死咗個仔依然都會「有依有靠」,咁在意識上係咪「有啲嘢」?

S:(無言)...

魔:第二,點解你一買就要買30年咁長?

S:咁佢會包哂全期,唔怕要續保。年紀大咗會加保費,抵啲吖馬。

魔:保險公司在計保費時早已計埋「包你全期,無需續保」時的風險,並計入保費之內,基本上「無死錯人」。除非你死的或然率大過保險公司的預設值,咁份保險先算係「抵買」,不過你都唔希望會發生架?

S:(無言)...

魔:所以,買得保險就預咗當將保金掉落鹹水海;如果要講「抵唔抵」,就一定「唔抵」架嘞!

S:(無言)...

魔:第三,假設你30年之後真係死鬼左,以5%通脤率計算,500萬保額等於依家嘅116萬,呢筆錢會留俾你到時已經30歲嘅仔。咁我又問吓你,如果你30歲時因為死老豆而得到116萬,你會好感謝佢嗎?

S:百零萬雖然唔係細數,但亦唔係咩嘢大數,又唔會高興到彈起嘅!屬好過無嗰種囉!

魔:就係囉。500萬呢個數,就當你萬一出事,個仔仲細,求學要錢;但係大咗之後呢筆錢對佢係咪仲係咁緊要呢?

S:咁你又講得啱。

魔:其實我地可以將人生分成兩種資本:一係人力資本(human capital),一係財務資本(finanical capital)。你一出世,人力資本係100,財務資本係0;到你死嗰陣,人力資本係0,財務資本係100。人生就係將人力資本轉化成財務資本的過程:愈後生,可塑性愈大,可能性愈多,人力資本亦愈多;當年紀漸長,你憑自己的勞力和智慧去搵錢,累積資金;到你老死嗰時,你再無能力去搵錢,亦已「搵完」,係唔係「搵夠」就是另外一個故事。

Picture

S:咁同保險有乜關係?

魔:人壽保險,保嘅就係你既人力資本,怕嘅就係你萬一有乜意外,人力資本轉換成財務資本的過程「忽然中斷」,咁依賴你生活嘅家屬都唔會徬徨無依。換句話說,你要投保嘅保額,應該等於你的人力資本,人愈老愈唔使保。試想如果今日你就死咗,你個仔的確會「無依無靠」,咁500萬可能真係有需要;但係如果佢已經20歲,你死咗佢仲有幾「無依無靠」?除非你話佢係港孩,20歲都要人餵飯,咁就唔同。

S:(無言)...

魔:你依家無醫療保險反而係一個問題。醫療保險可以幫你拉長將人力資本變成財務資本的時間。理性啲講,如果係醫返都嘥藥費的話,仲苟延殘喘有何意思?點解唔死咗佢好過?

S:咁又係。

魔:所以我話,你可以考慮吓可唔可以分開唔同時期買,同埋保額應愈保愈少,因為理論上係愈來愈少人會依賴你去維持生活。所以有啲人話要同細路買保險,同寵物買保險,受益人係自己;難道你會依賴個仔同寵物生活麼?嗰啲只能話係「騙局」。

S:哈哈哈!

魔:你減咗年期或保額,省回來的錢可以用來享樂,也可以用來投資。反正你的保額都係要死咗先有,意識上屬於「遺產」(雖然實際上可以即時領取),咁如果你用呢筆省回來的錢投資的話,未必會少過呢個數囉。

S:嗯,明白了!

***

伸延閱讀:

港女港妻港媽

101 Plan

101投資保險

2011/07/07 17:20:54 


[7]

精彩,十分同意保額和年期的考慮點,我自己都係幾年幾年咁續。


[引用] | 作者 darthmike | 22-Jul-16 00:52 | [舉報垃圾留言]

[6]

買左保險唯一可以EARN既, 就係, 一買即死, 即刻有得賠,如果唔係都係sunk cost黎!


[引用] | 作者 高估 | 24-Nov-12 16:56 | [舉報垃圾留言]

死得太快會俾保險公司搵人查你的!

[引用版主回覆] | 作者 不敗的魔術師 | 25-Nov-12 00:49

[5] 醫保

多謝分享 ! 不過政府嘅自愿醫保無咁快搅得掂. 點都會就住保險公司嚟推. 最吸引都係個包底方案.

而家有D保險公司同一病患可以多次claim. 但就有條款限制. 要出入多醫院幾次. 無錯保險公司又係博你嚴重到唔可以出出入入. 精算師又係計過哂.

咁,大家都只可以喺云云吋草不生嘅plan中搵個最化算嘅嚟買. 而如果潇洒到好似魔術師先生你連醫保都唔會考慮就另計.

或者我考慮吓保柏先. 


[引用] | 作者 Den | 11-Jul-11 21:06 | [舉報垃圾留言]

>多謝分享 !

好說好說,不用客氣.

>而家有D保險公司同一病患可以多次claim. 但就有條款限制.

個人覺得同樣重要的,就是「現存病患」.尤其是現代都市人生活規律和飲食習慣都不健康,血壓同膽固醇高一兩度,話都無咁易.

>大家都只可以喺云云吋草不生嘅plan中搵個最化算嘅嚟買

係呀,所謂「抵」,其實只係揀個無咁搵笨的plan.

>或者我考慮吓保柏先.

有線時事寬頻特約 ^_^

[引用版主回覆] | 作者 不敗的魔術師 | 11-Jul-11 22:01

[4] Re: 不敗的魔術師
不敗的魔術師 :
>保險公司賺的利潤,本來就是來自資訊不平等。


有點你還沒說﹐就係保險公司會拿你的錢去投資的。
嚴格來講﹐保險公司是透過客人供保來集資﹐然後進行投資。而每間公司受保之時﹐已計算你出時的機會率。
總之﹐除非發生突大天災﹐導致多個客人一齊出事﹐那保險公司就會像銀行滯提一樣出事。否則﹐保險公司是絕對不會蝕的。
據我所知﹐每間公司都有一條保險方程式﹐來計算客人投保的風險和所需金額。

文少
[引用] | 作者 文少 | 10-Jul-11 00:18 | [舉報垃圾留言]


係呀, 保險公司最怕就係息率(包括通脹)不明,呢樣野除咗經濟,仲會牽涉到政治和國與國之間的角力,非一般精算師可以用方程式計出來,出事多數出係呢啲位.

所以金融海嘯, 全球火燒連環船, 保險公司大到連AIG都要叫救命.

[引用版主回覆] | 作者 不敗的魔術師 | 10-Jul-11 01:22

[3] Re: 不敗的魔術師
不敗的魔術師 :
我成日都打錯字的,莫怪.
當時我個friend真係一呆,佢係完全無想過點解有同樣搵錢能力的港女老婆又唔怕一旦死咗之後個仔會「無依無靠」喎!


睇你講過你老朋﹐都知佢婆係賢妻良母啦(笑)
我比較相信﹐條女無諗﹐係因為根本佢從無諗得咁長遠
我識好多香港女仔﹐會諗多幾個月後的事﹐已算係有遠見gala

文少
[引用] | 作者 文少 | 10-Jul-11 00:08 | [舉報垃圾留言]


我有問過朋友S,話條女咁款仲生仔? 佢以苦笑回答.

我估條女有可能在dom dom 裡做手腳.

[引用版主回覆] | 作者 不敗的魔術師 | 10-Jul-11 01:19

[2]

人力資本VS財務資本. 而醫保係拉長兩者轉換關係嘅理論都好合理.保險從業員用嚟sell
客應該都幾動聽. 幾 PRO.

我個中醫長輩就成日用類似理論嚟嚇我"後生時用健康換錢.年纪大時用錢去換健康" 當然咁講係極端化咗.但就係要用嚟提醒D 人唔好因為賺錢唔理身體.

講番保險, 通脹無錯係侵食30年後所得嘅現金.但唔好忘記, 通脹都同样侵食緊固定保費. 即係你今年比HKD 20,000 嘅保費. 廿年後計通脹大概只係HKD 8,000

咁你自己有無買保險 ? 如有, 可唔可以講吓你買咗邊個plan ? 我最近都想買多一份保險.醫保為主. 最近見緊Agent,  重傾緊.


[引用] | 作者 Den | 09-Jul-11 01:19 | [舉報垃圾留言]

>通脹無錯係侵食30年後所得嘅現金.但唔好忘記, 通脹都同样侵食緊固定保費. 即係你今年比HKD 20,000 嘅保費. 廿年後計通脹大概只係HKD 8,000

你都諗到,保險公司會不知道麼?通脹早就計入保費之內。

保險公司賺的利潤,本來就是來自資訊不平等。

保險公司有的是資源,可以請好多精算師回來,以人口死亡或然率和通脹之頖計出保費。一張30年的保單,保費表面上不加價,其實只是等於一連串每月/每年供款的折現值再加起來。由於現金流折現值主要是由起始部份主宰,現金流發生得愈後,折現因子愈大,對整條數的影響就愈微;亦即是話,保險公司在30年的保單上早已計入通脹,並將其包括入保費之內,而前期的保費會收得較多(亦即是顧客是「交多了」保費)。由保險公司不會公開其對人口死亡率和通脹的假設,消費者難以判斷其假設是否合理,就是所謂的「資訊不平等」。我不會稱之為「資訊霸權」,皆因要預測經濟環境,本來就是很困難之事(但保險公司又會將其中的風險計算入內)。

每張保單理論上都可以簡化成即時繳交全部保金,而非分期付款。例如,一張30年保單,現在即時繳交全部保金,要付10萬元,「無通脹分期」每月交100000/360=$278.78。如果每月交,設通脹率為5%,每月保金不變,PMT(0.004167,360,100000)=$536.82,接近「無通脹分期」的兩倍。如果保險再加上資金成本,計錯數的風險溢價等,就當係再加多10%(總折現值為15%)吧,如此調整後保費則為PMT(0.00125,360,100000)=$1264.44,是「無通脹分期」的4.5倍。

消費者卻不知道保險公司訂下多少假設,莊家(保險公司)的贏面太大,實在玩唔過。

至於我自己,我無咩嘢親屬要依靠我生活,所以我無買任何壽險。醫保就買得過,但坊間的醫保條款又係莊家贏哂,例如同一病患,claim咗就唔再賠;反而政府個plan,可以睇清楚詳細資料再作評論。

又,基本上除年少無知時有被保險經紀打動過,自近年財務武功略有小成,一般agent已埋唔到我身。

[引用版主回覆] | 作者 不敗的魔術師 | 09-Jul-11 15:54

[1]

先認字特警﹕
即係你死咗就怕個死(仔)無依無靠

//如果港女老婆唔買,即係你死咗就怕個仔無依無靠,佢死咗個仔依然都會「有依有靠」,咁在意識上係咪「有啲嘢」?//
有D真相﹐唔好講出來啦﹐好傷感情ga(笑)

文少
[引用] | 作者 文少 | 08-Jul-11 04:32 | [舉報垃圾留言]


我成日都打錯字的,莫怪.

當時我個friend真係一呆,佢係完全無想過點解有同樣搵錢能力的港女老婆又唔怕一旦死咗之後個仔會「無依無靠」喎!

[引用版主回覆] | 作者 不敗的魔術師 | 08-Jul-11 22:57